Женева шаарында өткөн Украинадагы согушту тынчтык жолу менен жөнгө салуу боюнча сүйлөшүүлөрдө тараптар аймактык маселеде орток пикирге келе алышкан жок. Бул тууралуу Украинанын президенти Владимир Зеленский 18-февралда британиялык журналист Пирс Морганга берген маегинде билдирди.
Зеленскийдин айтымында, аскердик багытта, айрыкча ок атышууну токтотууну көзөмөлдөө механизмдери боюнча белгилүү бир жылыш бар. Анын сөзүнө караганда, мүмкүн болгон элдешүүдөн кийин ок атышууну көзөмөлдөө тартибин бекиткен өзүнчө документке кол коюу пландалууда. Мониторингде негизги ролду АКШ ойношу мүмкүн.
«Аскердик багытта биз саясий маселелерге караганда макулдашууга жакыныраакпыз. Аскер өкүлдөрү саясий чечим кабыл алынган учурда ок атышууну кантип көзөмөлдөө керектигин талкуулашты», — деди ал.
Ошол эле учурда саясий блок эң татаал бойдон калууда. Президент аймактык маселе боюнча сүйлөшүүлөргө катышкан тараптар «үч башка позицияны» карманып жатканын белгиледи.
Зеленский Украина мурда АКШ сунуштаган принципти колдой турганын эске салды: адегенде ок атышууну токтотуу, андан кийин убактылуу оккупацияланган аймактардын макамын дипломатиялык жол менен талкуулоо. Ал Киев ар кандай форматтагы сүйлөшүүлөргө даяр экенин, бирок бул бардык демилгелерди колдоону билдирбей турганын айтты.
АКШ тарабынан сунушталган варианттардын бири — Киев көзөмөлдөгөн Донбасстын бир бөлүгүнөн украин аскерлерин ыктыярдуу чыгарып кетүү аркылуу согушту токтотуу маселеси талкууланган. Зеленский мындай сценарий Украина үчүн кабыл алынгыс экенин баса белгиледи.
«Биз жөн эле чыгып кете албайбыз. Бул — биздин аймак. Убактылуу оккупацияланган бөлүгү да биздин жер. Биз Россиянын көзөмөлүн юридикалык да, де-факто да тааныбайбыз. Бирок азыр турган чек арада токтойлу — бул компромисс болушу мүмкүн», — деди ал.
Президент аймактык маселе саясий гана эмес, стратегиялык мааниге да ээ экенин, ал өлкөнүн келечектеги коопсуздугу менен түз байланыштуу экенин кошумчалады. Анын айтымында, украин коомчулугу чоң жоготуулардан кийин аймактык жеңилдиктерге барууга даяр эмес.