Бишкектеги М.Миррахимов атындагы Кардиология жана терапия улуттук борбору капиталдык оңдоодон өтүп, мекеменин негизги корпустарында кеңири курулуш жана жаңылоо иштери жүргүзүлүүдө. Учурда оңдоо иштеринин биринчи жана экинчи этаптары активдүү жүрүп жатат.
Оңдоо алкагында поликлиника, операциялык блок, нефрологиянын жертөлөсү, тамак-аш блогу жана бир катар дарылоо бөлүмдөрү жаңыланууда. Ошондой эле инженердик тармактар — суу менен камсыздоо, канализация, электр энергиясы, жылытуу жана вентиляция системалары толугу менен алмаштырылып жатат. Нефрология, ревматология жана терапия бөлүмдөрүндө оңдоо иштери аяктап, жаңы электр жана жылытуу системалары орнотулду, өрт коопсуздугу жана видеокөзөмөл жаңыртылды. Мекемеге төрт жаңы лифт коюлуп, конференц-зал жана бир катар кабаттар толук капиталдык оңдоодон өткөрүлдү.
Поликлиника жана стационар бөлүмдөрү жогорку даярдыкта экени белгиленип, бардык иштерди жакынкы айларда толук бүтүрүү пландалууда. Оңдоо иштеринин максаты — бейтаптар үчүн коопсуз жана ыңгайлуу шарт түзүү, ошондой эле дарыгерлердин иштөө шарттарын жакшыртуу.
Мындан тышкары, Саламаттык сактоо министрлигине караштуу Жүрөк хирургиясы жана органдарды трансплантациялоо илимий-изилдөө институту имаратында да калыбына келтирүү иштери аяктоо стадиясында турат. Бул мекемеде өткөн жылы чыккан өрттөн кийин кеңири реконструкция жүргүзүлүп, ички конструкциялар жаңыртылып, инженердик системалар толук алмаштырылды. Институт үчүн 270 миллион сомго заманбап медициналык жабдуулар сатылып алынган.
Жүргүзүлүп жаткан иштер өлкөдө кардиологиялык жана кардиохирургиялык жардамдын сапатын жогорулатууга, бейтаптар үчүн шарттарды жакшыртууга жана медициналык кызмат көрсөтүүнүн деңгээлин көтөрүүгө багытталган.