5–6-март күндөрү Ош шаарынын борбордук аянтында «Агроэкспо-2026» эл аралык көргөзмө-жарманкеси уюштурулат. Бул тууралуу Суу ресурстары, айыл чарба жана кайра иштетүү өнөр жайы министрлиги маалымдады.
Иш-чаранын алкагында катышуучулар айыл чарба тармагындагы акыркы инновациялар, климаттын өзгөрүүсүнө ылайыкташкан заманбап технологиялар жана туруктуу өнүгүү чечимдери менен тааныша алышат.
Көргөзмөнүн программасында:
- айыл чарба техникаларынын жана жаңы технологиялардын демонстрациясы;
- сапаттуу үрөндөрдүн жана көчөттөрдүн көргөзмөсү;
- көчөт тандоо жана отургузуу боюнча мастер-класстар;
- тамчылатып сугаруу системалары, санарип суу платформалары жана «жашыл» энергия булактары;
- айыл чарбасын каржылоо жана лизинг мүмкүнчүлүктөрү боюнча маалыматтар.
Мындан тышкары, келген коноктор үчүн адистердин кеңештери, баалуу белектер ойнотулуучу лотереялар жана шоу-программа уюштурулат.
«Агроэкспо-2026» агробизнес өкүлдөрү, фермерлер жана тармактык адистер үчүн тажрыйба алмашууга, жаңы өнөктөштөрдү табууга жана кызматташтыкты кеңейтүүгө багытталган ири аянтча болуп саналат.