Шавкат Мирзиёев жана Эмомали Рахмон өнөр жай кооперациясынын алкагында 10 биргелешкен долбоорду расмий түрдө ишке киргизишти. Бул тууралуу Өзбекстандын президентинин басма сөз кызматы билдирди.
Маалыматка ылайык, лидерлер жаңы долбоорлорду символикалык түрдө баштоо аземине катышты. Долбоорлордун катарында эмерек жана тери буюмдарын чыгаруучу ишканаларды түзүү, тиричилик техникасынын өндүрүшүн кеңейтүү, Тажикстанда текстиль ишканаларын куруу, Ташкент шаарында турак жай комплекстерин жана соода объектилерин салуу бар.
Ошондой эле Фергана облусунда консервалык продукция чыгаруу, Андижан облусунда сүт азыктарын өндүрүү, Сурхандарья облусунда жемиш ширелерин жана металл брикеттерин өндүрүүчү ишканалар ишке киргизилди.
Жыйынтыгында Шавкат Мирзиёев менен Эмомали Рахмон стратегиялык өнөктөштүктү жана союздаштык мамилелерди тереңдетүү боюнча биргелешкен билдирүүгө кол коюшту. Мындан тышкары, өкмөттөр, министрликтер жана мекемелер деңгээлинде көп тармактуу кызматташууну өнүктүрүүгө багытталган документтер пакети кабыл алынды.
Кол коюлган документтер товар жүгүртүүнү көбөйтүү, өнөр жай кооперациясын өнүктүрүү, товарлардын келип чыгышын электрондук сертификаттоо системасын киргизүү жана «E-Permit» системасын колдонуу сыяктуу негизги багыттарды камтыйт. Ошондой эле саламаттык сактоо, илим жана чек ара аймактарында радиожыштыктарды жөнгө салуу тармактарында кызматташуу боюнча макулдашуулар жетишилди.
Тараптар 2026–2028-жылдарга карата өнөр жай, инновация, тоо-кен тармагы, туризм, агроөнөр жай комплекси жана маданий алмашуу боюнча бир катар программаларды жана «жол карталарын» бекитишти. Мындан тышкары, Ташкент шаарындагы жаңы көчөлөрдүн бирине Душанбе шаарынын атын ыйгаруу боюнча салтанаттуу азем да өткөрүлдү.
Акыркы жылдары Өзбекстан менен Тажикстан ортосундагы экономикалык байланыштар чыңдалып келет. 2025-жылы эки өлкөнүн ортосундагы товар жүгүртүү 718,3 миллион долларды түзүп, 2024-жылга салыштырмалуу 22,5%га өскөн.
