АКШнын Коргоо министрлиги армиянын штаб башчысы Рэнди Джордж кызматтан кетерин билдирди. Бул тууралуу Пентагондун расмий өкүлү Шон Парнелл маалымдады.
Маалыматка ылайык, Рэнди Джордж 2023-жылдын август айынан бери бул кызматты аркалап келген. Анын кызматтан кетүү себептери расмий түрдө айтылган жок.
АКШнын Коргоо министри Пит Хегсет армия жетекчилигинде өзгөрүүлөрдү жүргүзүү чечимин кабыл алган. Маалыматтарга караганда, министр жаңы команда аркылуу өзүнүн жана президент Дональд Трамптын саясатын ишке ашырууну көздөйт.
Жаңы дайындоолордун алкагында армия штабынын башчысынын милдетин убактылуу генерал Кристофер Ланив аткарат. Ал буга чейин Коргоо министринин аскердик жардамчысы болуп иштеген.
Ошондой эле бир катар жогорку даражалуу аскер жетекчилери, анын ичинде Дэвид Ходн жана Уильям Грин кызматтарынан алынганы кабарланды. Бул чечимдердин себептери да ачык айтылган жок.
Буга чейин Дональд Трамп бир нече жогорку даражалуу аскер жетекчилерин, анын ичинде Бириккен штаб башчылары комитетинин төрагасы Чарльз Браунду кызматтан алган.
Бул өзгөрүүлөр АКШнын аскердик жетекчилигинде олуттуу кадрдык жаңылануулар жүрүп жатканын көрсөтөт.
