АКШ президенти Дональд Трамп Иран Ормуз кысыгын ачса, аскердик соккуларды эки жумага токтотууга макул болгонун билдирди.
Анын айтымында, Иран тарабынан 10 пункттан турган сунуш түшүп, ал документ мүмкүн болгон келишимдин негизи катары каралууда. Трамп бул эки жумалык мөөнөт акыркы макулдашууга жетишүү үчүн зарыл экенин белгиледи.
Өз кезегинде Иран ок атышууну токтотууга макул экенин билдирген, бирок бир катар шарттарды койгон. Израил да ок атышууну токтотуу демилгесин колдогону менен, бул Ливандагы кырдаалга тиешеси жок экенин белгиледи.
Буга чейин Трамп Иран Ормуз кысыгын ачпаса, анын жарандык инфраструктурасына, анын ичинде көпүрөлөргө жана электр станцияларына сокку уруларын эскерткен. Ал тургай катуу риторика колдонуп, Иранга каршы олуттуу чаралар көрүлөрүн айткан.
Ортомчу катары Пакистан эки тарапка тынчтык сунушун берген. Ага ылайык, АКШ эки жумага соккуларды токтотуп, Иран кысыкты ачууга тийиш.
Трамп Пакистандын премьер-министри Шехбаз Шариф жана аскер жетекчиси Асим Мунир менен сүйлөшкөнүн белгилеп, алар АКШны аскердик аракеттерди убактылуу токтотууга чакырганын айтты.
АКШ президентинин билдирүүсүнө ылайык, эки өлкө ортосундагы негизги талаш маселелердин көбү чечилген жана жакынкы убакта толук келишимге жетишүү мүмкүнчүлүгү бар.
