Кечээ Чүйдүн Жайыл районундагы көлмөгө автоунаа кулап, алты кичинекей бала сууга чөгүп кетти. Бул тууралуу облустук милициянын маалымат кызматы кабарлады.
Милициянын маалыматында Volkswagen Jetta унаасынын 40 жаштагы айдоочусу Г.Т., 26 жаштагы аялы, алардын 7, 6, 4 жаштагы жана быйыл төрөлгөн баласы, ошондой эле 27 жаштагы кайнежеси жана анын 9, 7, 6, 5 жаштагы балдары менен сууга түшүүгө келишкен. Унаада жалпы 11 киши болгон.
“Ошол жерден Г.Т. спирт ичимдигип ичип, мас абалында унаасын буруп жатып дөңсөөдөн оодарылып, ичиндегилер менен сууга түшүп кеткен. Машинанын ичинен айдоочу, жубайы, экөөнүн жаңы төрөлгөн баласы, балдызы жана анын 7 жаштагы кызы чыгып кетүүгө үлгүргөн. Калгандары чөгүп кеткен”, — деп жазылган маалыматта.
Чүй облустук милициясы автоунаа башкарган киши «сууга түшүүгө болбойт» деген эскертүүгө карабай сууга түшүп, машинаны мас болуп айдап, натыйжада балдар өлгөнүн айтты.
Ага карата Кылмыш-жаза кодексинин 312-беренеси («Автомототранспорт каражаттарынын кыймылынын жана аларды эксплуатациялоонун коопсуздук эрежелерин бузуу») менен кылмыш иши козголуп, убактылуу кармоочу жайга киргизилген. Тергөө жүрүп жатат.
Иш ИИМ менен Чүй ОИИББдин жетекчилиги тарабынан өзгөчө көзөмөлгө алынган.