Кытай Ляонин провинциясында тарыхындагы эң ири алтын кенин тапканын жарыялады. Жаңы ачылган Дадунгоу аттуу кендин запасы 1 444 тонна деп бааланууда. Бул ачылыш Кытайдын жалпы алтын корун кыйла көбөйтөт, айрыкча алтындын дүйнөлүк баасы тез өсүп турган шартта.
Кытайдын Жаратылыш ресурстары министрлигинин маалыматына ылайык, бул — 1949-жылдан берки өлкөдө табылган эң ири алтын кени. Ал жерде 2,586 миллион тонна руда бар, анын ар бир тоннасында орточо 0,56 грамм алтын кездешет. Жыйынтыгында жалпы көлөмү 1 444 тонна таза алтынга туура келет.
Учурдагы баалар менен эсептегенде, бул көлөмдөгү алтындын наркы 166 миллиард евродон ашат. Алтындын баасы дүйнөлүк рынокто рекорд коюп, 1 килограммы 115 миң евродан жогору болууда.
Проектти Ляониндеги геология-кен компаниясы ишке ашырган. Ага жалпысынан миңге жакын адис жана техникалар тартылып, иштер болгону 15 айда бүткөрүлгөн — бул сыяктуу ири масштабдагы долбоор үчүн өтө кыска мөөнөт деп белгиленет. Министрлик кенди «ири» жана «аз курамдагы руда» категориясына киргизип, алдын ала экономикалык баалоо ийгиликтүү аяктаганын кабарлады.
Кытай бийлиги кендин так координаттарын айта элек, бирок ал Ляонин провинциясынын чыгыш тарабында жайгашканы белгилүү. Бул ачылыш дүйнөлүк экономикалык туруксуздук шартында алтынды коопсуз актив катары кароого болгон кызыгуу өсүп жаткан мезгилге туура келди.
