Суу ресурстары, айыл чарба жана кайра иштетүү өнөр жайы министрлигинин демилгеси менен өлкөнүн бардык аймактарында өтүп жаткан азык-түлүк жарманкелери 2026-жылдын июнь айына чейин уланмай болду. Бул тууралуу министрликтен билдиришти.
Маалыматка ылайык, ар бир район үчүн атайын график бекитилип, жарманкелер аптанын белгиленген күндөрү өткөрүлүп жатат. Райондордун тиешелүү кызматкерлери иш-чараны үзгүлтүксүз уюштурууга милдеттендирилген.
Жарманкелерде азык-түлүк продукциялары базардагыдан төмөн баада сунушталууда. Жарандар бир аптага жетерлик керектүү азыктарды арзан баада сатып ала алышат.
Министерлик учурда өлкө боюнча негизги азык-түлүк продукцияларына тартыштык жок экенин, кор жетиштүү экенин белгилеп, жарманкелер ички рынокту туруктуу камсыздоого жана жарандарды сапаттуу азык-түлүк менен жеткиликтүү баада камсыз кылууга багытталганын билдирди.
Мекеме мындай демилге айыл чарба тармагын колдоого жана аймактардын экономикалык активдүүлүгүн арттырууга өбөлгө болорун кошумчалады.
