Саламаттык сактоо министрлиги 18 жаштан жогорку эркектер арасында жугуштуу эмес оорулардын коркунуч факторлорун аныктоого багытталган «Жооптуу бол!» аталышындагы республикалык айлыктын башталганын жарыялады.
Акциянын алкагында эркектерге жашаган жери боюнча Үй-бүлөлүк медицина борборлору, Жалпы дарыгерлик практика борборлору, үй-бүлөлүк дарыгерлер топтору жана фельдшердик-акушердик пункттарга кайрылып, алдын алуу консультацияларынан өтүү сунушталат.
2025-жылы өлкө боюнча 973 000ден ашык эркек профилактикалык скринингден өтүп, алардын ичинен:
119 600 эркекте кан басымы жогорулаганы аныкталган,
49 600 эркек жүрөк-кан тамыр ооруларынын жогорку тобокелдигинде болгон,
60 800 эркек кант диабетинин жогорку тобокелдигинде болгон.
Ошондой эле 2025-жылы 15 388 адам биринчи жолу артериялык гипертензия, ал эми 7 364 адам кант диабети диагнозу менен каттоого алынган. Жүрөк-кан тамыр оорулары өлкөдө 16 644 өлүмгө себепчи болгон.
Министрлик эркектерди ден соолугуна жооптуу мамиле кылууга жана профилактикалык текшерүүлөрдөн өтүүгө чакырат.
