Бишкек шаарындагы №65-мектептин окуучуларынын ата-энелери массалык маалымат каражаттарына кайрылып, билим берүү мекемесинде мугалимдердин жетишсиздигине даттанышууда.
Ата-энелердин айтымында, 2024–2025-окуу жылында мектептеги билим берүүнүн деңгээли кескин төмөндөгөн. Алар бул абал мугалимдерге же мектеп администрациясына эмес, кадр маселесиндеги олуттуу көйгөйлөргө байланыштуу экенин белгилешет.
«Негизги маселе — кадрлардын катастрофалык жетишсиздиги. Атүгүл класс жетекчилер да жетпей жатат. Биздин класста бул окуу жылында үч жолу класс жетекчи алмашты», — дешет ата-энелер.
Ошондой эле ата-энелердин маалыматына ылайык, №65-мектептин окуучулары жарым жылдан ашык убакыттан бери орус жана англис тилдерин окушкан эмес. Мындан тышкары, химия жана биология сабактары да өткөрүлбөй келет.
«Мунун натыйжасында балдар негизги билимдерден куру калып, окуу программасынан артта калууда жана башка мектептердеги окуучуларга салыштырмалуу тең эмес шарттарда калып жатышат. Бул — башкаруудагы кемчиликтер үчүн күнөөсү жок балдардын маселеси», — дешет алар.
Ата-энелер жоопкерчилик Билим берүү министрлигинин мойнунда экенин айтышат.
«Кадрдык кризис шартында иштеп жаткан мугалимдер күнөөлүү эмес. Билим берүү министрлиги мектептерди квалификациялуу педагогдор менен камсыз кылууга, билим берүү процессинин сапатын жана үзгүлтүксүздүгүн көзөмөлдөөгө милдеттүү. Негизги сабактардын узак убакыт өткөрүлбөй калышына жол берилбеши керек. Ушуга байланыштуу ата-энелерде мыйзамдуу суроо жаралат: балдарыбыздын жоготкон окуу убактысы жана билими үчүн ким жооп берет?» — дешет алар.
Ата-энелер төмөнкү талаптарды коюшууда:
№65-мектептеги кадр тартыштыгын тез арада жоюу;
бардык предметтер боюнча толук кандуу сабактарды калыбына келтирүү;
Билим берүү министрлигинин ата-энелерге ачык жана расмий жообун берүү.
Kaktus.media редакциясы бул маселе боюнча Бишкек шаарынын мэриясына караштуу Билим берүү департаментине жана Билим берүү министрлигине кайрылган.
Департаменттен билдиришкендей, №65-мектептин директору 20-январдан бери ооруканада дарыланууда.
«Мектеп директору ишке чыккандан кийин кайрылуу каралат. Кадрларды тандоо жана жайгаштыруу боюнча жоопкерчилик мектеп директоруна жүктөлөт», — деп билдиришти департаменттен.
Ал эми Билим берүү министрлигинен мектептеги кадр жетишсиздиги боюнча кырдаал көзөмөлгө алынып, маселе боюнча чаралар көрүлөрүн маалымдашкан.
