Бишкек–Нарын–Торугарт автожолунун 291-чакырымында, Кара-Ункур капчыгайында кар көчкү түштү.
Транспорт жана коммуникациялар министрлиги билдиргендей, учурда жолдун бул тилкесинде кыймыл чектелип, унаалар бир тилке аркылуу кезектешип өткөрүлүүдө. Кар массасынын так көлөмү такталууда.
Окуя болгон жерде №41 Жол тейлөө ишканасынын кызматкерлери иш алып барып жатышат. Атайын техникалар тартылып, жолду кардан тазалоо иштери жүргүзүлүүдө.
Аталган трасса борбор калааны Нарын облусу жана Кытай менен чектешкен “Торугарт” өткөрмө бекети менен байланыштырган стратегиялык маанидеги багыт болуп саналат. Ошондуктан кыймылдын жарым-жартылай чектелиши жүк жана жүргүнчү ташууга таасирин тийгизет.
Айдоочуларга жол кырдаалын эске алып, коопсуздук эрежелерин сактоо жана тиешелүү кызматтардын көрсөтмөлөрүн так аткаруу сунушталат. Жол толук тазалангандан кийин кыймыл кадимки тартипте калыбына келтирилет.
