Министрлер кабинети 2025-жылдын 3-мартындагы №105 токтому менен жаныбарларды жана алардан алынган азыктарды идентификациялоого байланыштуу жобого өзгөртүүлөрдү бекитти. Жаңыртуулар мыйзам талаптарына шайкеш келтирүү жана малды визуалдык идентификациялоо жол-жобосун тактоо максатын көздөйт.
Жаңы тартипке ылайык, бодо малды, жылкыларды, эшектерди жана качырларды идентификациялоодо микрочиптер менен катар кошумча «i» белгиси колдонулат. Бул белги суюк азот аркылуу жаныбардын сол жагына — сан бөлүгүнө же жаактын ылдый жагына басылат.
Мындай ыкма мурда каттоодон өткөн малды көзмө-көз таанууну жеңилдетип, аларды сатуу же алмаштыруу учурундагы тобокелчиликтерди азайтууга багытталган.
Жобо расмий жарыяланган күндөн тартып он күндөн кийин күчүнө кирет.