Талас облусунун Манас району жана Бакай-Ата районунда “Социалдык контракт” программасынын алкагында 71 үй-бүлөгө жеке ишкерлигин баштоо үчүн 150 миң сомдон берилди. Бул тууралуу Кыргыз Республикасынын Эмгек, социалдык камсыздоо жана миграция министрлиги маалымдады.
Маалыматка ылайык, каражат алган үй-бүлөлөр төмөнкүдөй бөлүштүрүлгөн:
- Манас районунан — 31 үй-бүлө;
- Бакай-Ата районунан — 40 үй-бүлө.
Министрдин биринчи орун басары Камчыбек Досматов билдиргендей, 2026-жылы Талас облусу боюнча жалпы 682 үй-бүлөгө ушул программа аркылуу каражат берүү пландалууда.
Анын айтымында, бул долбоор аймактарды өнүктүрүүгө жана өлкөнүн өнүгүү стратегиясын ишке ашырууга олуттуу салым кошот. Программанын катышуучулары өз үй-бүлөсүн киреше менен камсыз кылуу менен бирге, жергиликтүү коомчулуктун жашоо деңгээлин жогорулатууга да жардам берет.
Белгиленгендей, “Социалдык контракт” программасына катышкандардын 94,2 пайызын айыл жергесинде жашаган аялдар түзөт.