Бүгүн тышкы иштер министри Жээнбек Кулубаев Италиянын тышкы иштер министринин орун басары Эдмондо Чириелли жетектеген делегацияны кабыл алды. Бул тууралуу ведомстводон маалымдашты.
Жолугушууда министр Кулубаев Кыргызстан менен Италиянын ортосундагы эки тараптуу саясий байланыштардын активдешүүсүн канааттануу менен белгилеп, соода жана инвестиция сыяктуу тармактарда өз ара аракеттенүүнү кеңейтүүгө кызыкдар экенин белгиледи.
Өз кезегинде министрдин орун басары Чириелли Италиянын Борбордук Азия чөлкөмү жана Кыргызстан менен кызматташууну өнүктүрүүгө кызыкдар экенин ырастады.
Тараптар эл аралык күн тартибин, ошондой эле эки өлкөнүн эл аралык уюмдардын, анын ичинде БУУнун алкагында кызматташуусун, атап айтканда, тоолорду туруктуу өнүктүрүү боюнча биргелешкен демилгени алга жылдыруу жана 2027-жылы Бишкекте Глобалдык тоо саммитин өткөрүү маселелерин талкуулашты.
Белгилей кетсек, Италиянын тышкы иштер министринин орун басары баштаган делегация Кыргызстанга кыргыз-италиялык тышкы иштер министрликтер аралык консультацияларына катышуу үчүн келген.