Кыргызстанда жыл сайын уюштурулуп келген каржы сабаттуулук боюнча «Дүйнөлүк акча жумалыгы – 2026» маалыматтык жана билим берүү кампаниясы 30-марттан 3-апрелге чейин өтөт. Бул тууралуу Кыргыз Республикасынын Улуттук банкы билдирди.
Маалыматка ылайык, иш-чара «Акчаны акыл менен башкар — үйүңдө береке болсун» деген ураан алдында өлкөнүн бардык аймактарында уюштурулуп, жаштардын финансылык билимин жогорулатууга өзгөчө көңүл бурулат.
Кампания финансы-кредиттик уюмдар, мамлекеттик органдар, ошондой эле эл аралык жана коомдук институттар менен биргеликте өткөрүлөт. Анын алкагында коммерциялык банктарга экскурсиялар, билим берүүчү лекциялар, интерактивдүү жолугушуулар, сынактар жана башка тематикалык иш-чаралар уюштурулат.
Белгилей кетсек, Global Money Week — дүйнөнүн 170тен ашуун өлкөсүндө жыл сайын өткөрүлүп келген эл аралык демилге болуп саналат. Ал балдардын жана жаштардын финансылык сабаттуулугун жогорулатууга багытталган.
