30-марттан 2-апрелге чейин күтүлүп жаткан жаан-чачын жана абанын температурасынын жогорулашына байланыштуу Кыргызстандын тоолуу аймактарында жана ашууларында кар көчкү түшүү коркунучу жогорулайт. Бул тууралуу Кыргыз Республикасынын Өзгөчө кырдаалдар министрлиги маалымдады.
Маалыматка ылайык, төмөнкү унаа жолдорунун тилкелери кооптуу деп белгиленди:
- Бишкек — Ош унаа жолу: 121–138-чакырым (Төө-Ашуу), 198–255-чакырым (Чычкан капчыгайы, Ала-Бел ашуусу)
- Бишкек — Нарын — Торугарт унаа жолу: 292–305-чакырым (Долон ашуусу)
- Балыкчы — Казарман — Жалал-Абад унаа жолу: 201–205, 260–290, 326–349-чакырым (Көк-Арт ашуусу)
- Каракол — Эңилчек унаа жолу: 45–90-чакырым (Чоң-Ашуу ашуусу)
ӨКМ айдоочуларды төмөнкү коопсуздук эрежелерин сактоого чакырат:
- Унаалардын ортосундагы аралык 500 метрден кем болбошу керек
- Жолдор тайгак болуп, муз тоңушу мүмкүн — этият айдоо зарыл
- Дөңгөлөк чынжырларын, алгачкы жардам аптечкасын жана кошумча жылуу кийимдерди алып жүрүү сунушталат
Мындан тышкары, министрлик жарандарды мүмкүн болушунча кооптуу тилкелерге чыкпоого жана аба ырайынын шарттарын эске алууга чакырат.
