Кыргыз Республикасынын энергетика министри Таалайбек Ибраев жана Россиянын энергетика министри Сергей Цивилев Казань шаарында өткөн «Энергопром» форумунун алкагында энергетикалык инфраструктураны өнүктүрүү боюнча макулдашууларды бекемдешти.
Кол коюлган документ узак мөөнөттүү келишимдерге негиз түзүп, электротехникалык жабдууларды жеткирүү жана тармакты биргелешип технологиялык өнүктүрүүнү камтыйт.
Маалыматка ылайык, жаңы келишим эки өлкөнүн ортосундагы кызматташуунун форматын жаңы деңгээлге чыгарат. Ал жабдууларды жеткирүү менен гана чектелбестен, технология алмашууну жана өндүрүштөрдү өнөктөш өлкөлөрдүн аймагында жайгаштырууну да карайт.
Форумдун жүрүшүндө Кыргызстан менен Беларустун өндүрүштүк мүмкүнчүлүктөрү да тааныштырылды. Уюштуруучулар келечекте КМШ өлкөлөрүнүн баарынын катышуусун күтүп жатышат.
Тармактык ведомстволордун жетекчилери энергетика багытында бирдиктүү технологиялык мейкиндик түзүү, заманбап заводдордун жүктөмүн камсыз кылуу жана экспорттук потенциалды кеңейтүү боюнча күчтөрдү бириктирүүнү пландашууда.
