Кыргыз Республикасынын Президенти Садыр Жапаров “Кыргыз Республикасынын мамлекеттик сыйлыктары, ардак наамдары жана мамлекеттик сый акылары жөнүндө” мыйзамга кол койду.
Аталган мыйзам Жогорку Кеңеш тарабынан 2026-жылдын 19-мартында кабыл алынган.
Документтин негизги максаты — жарандардын мамлекет жана коом алдындагы эмгегин моралдык жактан баалоону чагылдырган заманбап жана иреттүү сыйлык системасын түзүү.
Мыйзамга ылайык:
- мамлекеттик сыйлыктардын, ардак наамдардын жана сый акылардын системасы оптималдаштырылып, 46 түрдүн ордуна 22 түрү калтырылды;
- жаңы сыйлыктар киргизилди, алардын ичинде:
- «Эрдик» ордени (даражасыз);
- «Ардак» медалы;
- «Кыргыз Республикасынын жаратманы» ардак наамы;
- «Кыргыз Республикасынын сыймыгы» ардак наамы;
Ошол эле учурда бир катар салттуу наамдар сакталды, анын ичинде:
- «Кыргыз Республикасынын эл мугалими»;
- «Кыргыз Республикасынын эл врачы»;
- «Кыргыз Республикасынын эл артисти»;
- «Кыргыз Республикасынын эл жазуучусу»;
- «Кыргыз Республикасынын эл акыны»;
- «Кыргыз Республикасынын эл сүрөтчүсү».
Мыйзам менен айрым мурдагы сыйлыктар жана наамдар жоюлду. Алардын катарына «Ата Мекен Баатыры» артыкчылык даражасы, «Данакер» ордени жана бир катар медалдар кирет.
Ошондой эле документте:
- сыйлыктардын укуктук статусу;
- аларга көрсөтүүнүн жана ыйгаруунун тартиби;
- сыйлыкка татыктуу адамдардын укук-милдеттери;
- социалдык кепилдиктерди аныктоо маселелери так жазылган.
Жаңы мыйзам мамлекеттик сыйлык берүү системасын иретке келтирип, анын ачык-айкындуулугун жана адилеттүүлүгүн жогорулатууга багытталган.
