Кыргызстанда аз камсыз болгон үй-бүлөлөргө берилүүчү «үй-бүлөгө көмөк» ай сайынгы жөлөк пулунун шарттары кайра каралды. Бул тууралуу Эмгек, социалдык камсыздоо жана миграция министрлиги билдирди.
Маалыматка ылайык, 2026-жылдын 10-апрелинде Министрлер Кабинетинин тиешелүү токтому кабыл алынып, жөлөк пулду алуу мүмкүнчүлүгүн кеңейтүү жана анын даректүүлүгүн жакшыртуу максатында бир катар өзгөртүүлөр киргизилди.
Жаңы эрежелерге ылайык:
- жеңил унаанын пайдалануу мөөнөтү 20 жылдан 15 жылга чейин кыскартылды;
- менчигинде бир турак жайы бар аз камсыз үй-бүлөлөр жөлөк пул ала алышат;
- эки же андан көп турак жайы барлар жөлөк пулдан четтетилет;
- кепилденген эң төмөнкү киреше 1000 сомдон 1500 сомго чейин жогорулатылды.
Белгиленгендей, бул өзгөртүүлөр 2026-жылдын 1-сентябрынан тарта күчүнө кирет.
Ошондой эле жаран райондук коэффициент каралган аймакта жашаса, жөлөк пул тиешелүү коэффициентти кошуу менен төлөнөт.
Бул чаралар социалдык жардамдын жеткиликтүүлүгүн кеңейтүүгө жана муктаж үй-бүлөлөрдү так аныктоого багытталган.
