Көндүмдөрдү өнүктүрүү фонду өлкө боюнча дээрлик 29 миң кыргызстандыкты, анын ичинде 815 мүмкүнчүлүгү чектелген жаранды окутууну уюштурган. Курстарга катышуу 97%ды, жумушка орношуу 69%ды түзгөн. Бул тууралуу Эмгек, социалдык камсыздоо жана миграция министрлигинен билдиришти.
Маалыматка караганда, Көндүмдөрдү өнүктүрүү фонду 2016-жылдан бери колледж жана кесиптик лицейлердин базасында кыска мөөнөттүү окуу курстарын уюштуруп келет. Азыркы учурда фонддун 98 билим берүү мекемеси, анын ичинде 72 кесиптик лицей, 9 колледж, 14 жеке окуу борбору жана 3 жогорку окуу жайы менен макулдашуулары бар. Алардын негизинде 127 кесипти окууга болот.
Ошондой эле учурда фонд аркылуу фонд аркылуу IT-технологиялар, айыл чарба, курулуш, энергетика, транспорт, жеңил жана тамак-аш өнөр жайы, туризм, тейлөө жана башка тармактарда иш берүүчүлөрдүн буйругу боюнча жаңы суроо-талапка ээ болгон кесиптерди ишке киргизүү колдонулууда.
«Жаңы кесипти үйрөнүү үчүн кесип жана ыңгайлуу окуу жайын тандап, арыз калтырып, ыңгайлуу окуу графигин макулдашуу керек», — деп айтылат маалыматта.