Бишкек мэриясы борбор калаа менен Ош шаарларындагы жол тыгындарын жоюунун жаңы жолун сунуштоодо.
Мэрия автокөлүктөрдүн мамлекеттик номердеги акыркы сандарына карата бөлүп, кезек-кезеги менен айрым күндөрү гана жүрө турган мыйзам долбоорун иштеп чыккан.
Алар төмөнкүдөй болмокчу:
Эгерде автоунаанын номери 1 жана 2 саны менен аяктаса, анда аларга дүйшөмбү күндөрү жүрүүгө болбойт
3 жана 4 менен аяктагандар — шейшембиде
5 жана 6 — шаршембиде
7 жана 8 — бейшембиде
9 жана 0 — жума күндөрү жүрүүгө болбойт
Графикти бузган жеке жактарга 1000 сом, юридикалык жактарга 5000 сом айып салынат.
Мындай чектөө саат 07:00дөн 21:00гө чейин киргизилет.
Мындай чектөө Монголиянын борбору Улан-Батордо ийгиликтүү ишке ашкан.
Чара атайын, нөөмөтчү жана коомдук транспортторго тиешелүү эмес.
1-июнга карата маалымат боюнча, Бишкекте 600 миңден ашык автоунаа жүрөт. Ошол эле маалда калаанын жолдору 350 миң автокөлүккө ылайыкталган.
Мэрия айдоочулардын 52%ы машинасын жалгыз айдаса, 33%ы бир жүргүнчү менен, үч жана андан көп жүргүнчү менен айдоочулардын 3,2%ы гана жүрөрүн айтат.