Кечээ Кыргыз футбол биримдигинин президенти Камчыбек Ташиев Дөлөн Өмүрзаков атындагы Бишкек шаарынын башкы спорттук аренасынын капиталдык оңдоп-түзөө иштеринин жүрүшү менен таанышты.
Кыргыз футбол биримдигинен билдиришкендей, көчмө жыйынга Бишкек шаарынын мэринин орун басары Азамат Кадыров, маданият, маалымат, спорт жана жаштар саясаты министринин биринчи орун басары Тимурлан Ажымалиев, Архитектура, курулуш жана турак жай-коммуналдык чарба мамлекеттик агенттигинин директору Нурдан Орунтаев жана КФБ башкы катчысы Медербек Сыдыков катышты.
Камчыбек Ташиев капиталдык оңдоо иштери менен таанышып, оюн талаасынын абалын, трибуна алдында жайгашкан бөлмөлөрдү карап чыкты.
Белгилей кетсек, ушул жылдын сентябрынан тарта аталган стадиондо футбол боюнча дүйнө чемпионатынын тандоо оюндарынын үчүнчү турунун беттештери өтө баштайт. Ошондуктан стадиондун оңдоо иштери ыкчамдык менен жүргүзүлүүдө.