Улуттук коопсуздук боюнча мамлекеттик комитеттин төрагасы Камчыбек Ташиев камакта жаткан мурдагы бажычы Райым Матраимовдун мойнуна 200 млн. доллар же 19-20 млрд. сом илингенин айтты.
Бул тууралуу ал 16-майда Кара-Суу шаарында сүйлөгөн сөзүндө айтып, Райымбек Матраимовго байланышы бар адамдардан Жогорку Кеңештен “тазалоо” иштери бүткөнүн, бирок мындай адамдар мамлекеттик кызматтарда дагы деле бар экенин билдирди.
«Парламенттен Матраимов менен чогуу жүргөн, чогуу бизнес кылгандардын баарын тазалап атабыз. Мамлекеттик органдардан да тазалап жатабыз, бирок дагы эле бар. «Матраимовго бул адамдардын байланышы бар» деп аким, губернатор бизге айтып, катуу иштешиңер керек. Эч ким сактап кала албайт. Матраимовдун мойнуна 200 млн. доллар илинген. Бул деген 19-20 миллиард сом. Силердин стадионго болгону 1 же 2 млн доллар кетет. Коррупцияга берип, коррупционерлерди колдогон үчүн мектеп, жол, стадиондор ушундай абалда. Алсызбыз. Эгерде алар уурдабай мамлекетке иштеп турганда стадион жаркырап турмак«, — деген УКМК башчысы.