“Элдик” депутаттык тобунун лидери, депутат Акылбек Түмөнбаев Ысык-Көл облусунун Түп районуна иш сапар менен барды. Эл өкүлү аймактагы көйгөйлүү социалдык объекттерди кыдыруунун алкагында, Бирлик айылындагы Түп дарыясынын жээгиндеги кооптуу тилкелердин абалы менен таанышты.
Түп дарыясы – Түп айыл аймагында, Бирлик менен Сары-Дөбө айылдарын бөлүп турат. Калктын 80 гектар үлүш жери дарыянын аркы өйүзүндө жайгашкандыктан, эл дарыяны кечип өтүп келишкен. Жазында суу көтөрүлгөн маалда кыйла кыйынчылык туулат.
2017-жылы контейнерден көпүрө салынып, бирок ал талапка жооп бербегендиктен улам колдонууга берилген эмес. Мындан улам, айылдыктар үчүн жаңы көпүрө салуу зарылдыгы турган.
Эл өкүлү Акылбек Түмөнбаев көпүрөнү өз каражатына куруп берүүнү колго аларын билдирди. Тиешелүү адистер чакырылып, жаңы көпүрөнү куруу боюнча иш-аракеттер башталды. Көпүрөнүн капиталдык курулушу жакынкы күндөрү даярдоо иштеринен кийин башталары айтылды.