Учурда Кыргызстанда эркектер пенсияга 63 жаштан, аялдар 58 жаштан чыгат, ал эми талап кылынгандан ашыкча стажы бар болсо үч жыл эрте чыгууга мүмкүндүк бар. Эми 1-июлдан тарта пенсияга мөөнөтүнөн мурда чыгуу нормасы токтойт.
Бул тууралуу Соцфонддун коомчулук менен иштөө башкармалыгынын башчысы Жеңишбек Мукамбетов: “1-июлдан тарта пенсияга мөөнөтүнөн мурда чыгуу нормасы жоюлат, бирок беш жыл иштегендерге пенсиянын базалык бөлүгү толук төлөнө баштайт”, – деп билдирди.
“Кыргызстанда эркектер пенсияга 63 жаштан, аялдар 58 жаштан чыгат. Ошол эле учурда эгер киши пенсия курагына жете электе эле талап кылынган кошумча 15 жыл эмгек стажысы болсо, ага мөөнөтүнөн мурда, үч жыл эрте пенсия чегерилчү (эркектерге 60 жашында, аялдарга 55 жашында).
Ошол эле учурда пенсиянын базалык бөлүмүн толук алыш үчүн эми эркектерге 25, аялдарга 20 жылдык эмгек стажы талап кылынбайт. 1-июлдан баштап беш жылдык эмгек стаж менен деле пенсиянын базалык бөлүгү толук төлөнөт”, – деп кошумчалады.
Анын айтымында, буга чейин стаж толук болбогон учурда пенсия теңдемелүү эсептелип келген. Эмгек стажысы жете электерге базалык бөлүк болгон 3 170 сомдун жарымы гана төлөнчү. Июлдан тарта толук төлөнүп калат. Башкача айтканда, беш жылдан кем иштебегендерге базалык бөлүмдүн баары берилмекчи.