Энергетика министри Таалайбек Ибраев бүгүн, 23-августта жумушчу сапары менен Нарын облусуна барды.
Бүгүн, 2024-жылдын 23-августунда Нарын электр тармактар ишканасына караштуу Жумгал жана Тогуз-Торо райондук электр тармактар ишканаларынын күз-кыш мезгилине карата даярдыгын текшерди.
Алгач Жумгал райондук электр тармактар ишканасына токтолуп, тийиштүү жетекчилерден күз-кыш мезгилине даярдыгы, жабдуулардын абалы, бүгүнкү күнгө чейинки аткарылган иштер боюнча маалымат алды. Анда министр аталган ишкананын 2011-жылы курулган эски имаратына күбө болуп, тийиштүү жетекчиге 2025-жылы жаңы имарат куруу, диспетчерлер үчүн шарттарды түзүү тапшырмасын койду. Жалпысынан алганда Жумгал РЭТи күз-кыш мезгилине 99%га даяр.
Мындан тышкары, энергетика министри Тогуз-Торо райондук электр тармагын текшерди. Анда керектүү жабдуулар менен камсыздоо, айлык маяна, атайын бригадалык автоунаа, Кызыл-Октябрь айылын электр энергиясы менен камсыз кылынбагандыгы тууралуу маалымат алып, 35/10 кВ “Казарман” көмөк чордонунун эскилиги жеткен жабдууларын текшерди.
Министр кызматкерлердин негизги көйгөйлөрүн уккан соң, жабдууларды сактоочу кампаны жаңылоо, авариялык өчүрүүлөр болгондо ыкчам калыбына келтирүү үчүн кошумча участок жана штат ачуу тапшырмасын койду. Аны менен катар кошумча жаңы техникалар менен кийинки жылы камсыз кылуу маселесин чечип берүүнү убадалады.
«Мен атайын эң алыскы аймактардагы электр ишканаларын текшерип жатам. Себеби, аларда көйгөй көбүрөөк. Алыскы райондо газ жок. Калк бир гана электр энергиясына муктаж. Ошол үчүн электр энергиясын үзгүлтүксүз беришибиз керек. Ал үчүн энергетиктерге жеткиликтүү шарт түзүлүшү керек. Бүгүн көтөрүлгөн маселеңерди буюрса жакынкы күндөрү толук чечип беребиз», — деди министр Ибраев.
.