Кыргызстанда 77 миң 361 аз камсыз болгон үй-бүлө электр энергиясына жеңилдетилген тарифтер менен төлөшөт.
Эмгек, социалдык камсыздоо жана миграция министрлигинен билдиришкендей, айына 700 кВт/саатка чейин электр энергиясын керектөөдө тариф 50 тыйынды түзгөн. Ал эми Кыргызстанда май айынан тарта электр энергиясына тарифтер көтөрүлгөнүнө байланыштуу бул үй-бүлөлөр 55,4 тыйындан төлөй башташкан.
2024-жылдын 1-майына карата «үй-бүлөгө көмөк» жөлөкпулун алган үй-бүлөлөрдүн саны 81 миң 508 үй-бүлөнү түзөт. Электр энергиясына жеңилдетилген тарифтер түрүндө даректүү социалдык колдоо «үй бүлөгө көмөк» ай сайын берилүүчү жөлөкпул алган 77 миң 361 аз камсыз болгон үй-бүлөгө көрсөтүлдү, бул 94,9%ды түзөт.
Ал эми аз камсыз болгон калган үй-бүлөлөрдүн жеңилдетилген тарифтерди албай жатышынын негизги себеби — ижарага алынган батирлерде, өндүрүштүк жайларда жашагандыктан электр энергиясына жеке эсептердин жоктугу, ошондой эле электр жарыгысыз жашаган үй-бүлөлөр болуп саналат.
Белгилей кетсек, 2022-жылдан тарта президенти Садыр Жапаровдун демилгеси менен ай сайын берилүүчү «Үй-бүлөгө көмөк» жөлөкпулун алган аз камсыз болгон үй-бүлөлөргө электр энергиясына жеңилдетилген тариф түрүндө кошумча социалдык колдоо көрсөтүлүүдө.