Жогорку Кеңештин 19-июндагы жыйынында “Кытай-Кыргызстан-Өзбекстан” темир жолун куруу тууралуу үч өлкөнүн өкмөттөрү кол койгон макулдашууну ратификациялоо тууралуу мыйзам долбоору каралды.
Транспорт жана коммуникациялар министринин орун басары Ырысбек Бариев темир жолдун маршруту, суммасы, каржылоосу жөнүндө маалымат берди. Ал темир жол Торугарттан кирип, Макмал аркылуу Жалал-Абадга өтүп, андан ары Өзбекстан тарапка кирип кетерин белгилеп, темир жолдун картасын көрсөттү.
Талкуу маалында депутат Гуля Кожокулова бул долбоорду ишке ашыруу мөөнөтүн тактап, аны тездетүүгө чакырды. Буга «Кыргыз темир жолу» улуттук компания» мамлекеттик ишканасынын башкы директору Азамат Сакиев долбоор 2024-жылдын октябрында башталарын маалымдады. Депутаттар Дастан Бекешев жана Надира Нарматова «Кытай – Кыргызстан – Өзбекстан» темир жолун куруу Кыргызстандын экономикасын өнүктүрүү үчүн зор маанисин белгилешти. Эл өкүлү Чингиз Айдарбеков темир жолду Кыргызстандын балансына өткөрүү шарттарына токтолду.
Жыйынтыгында мыйзам долбоору үч окууда кабыл алынды.