Грузиянын полициясы 14-декабрда Гудаури айылындагы лыжа базасындагы ресторанда сөөгү табылган 12 адамдын өлүмүн иликтеп жатканын билдирди.
11 чет элдик жана бир грузин жаранынын жансыз денелери ресторандын экинчи кабатындагы уктоочу бөлмөлөрдөн табылган. Каза болгондор ресторандын кызматкерлери экени айтылууда.
Полиция адамдар кырсыктын кесепетинен каза болгонун айтты. Уктоочу бөлмөлөрдүн жанындагы жабык жерде генератор иштеп жатканын жана электр энергиясы өчүп калгандыктан күйгүзүшкөнүн белгилейт.
Полиция этиятсыздыктан адам өлүмүнө алып келүү беренеси боюнча (Кылмыш-жаза кодексинин 116-беренеси) тергөө ишин баштады. Иштин алкагында өлүмдүн так себебин аныктоо үчүн соттук-медициналык экспертиза дайындалды.