Акыйкатчынын Жалал-Абаддагы өкүлчүлүгү Сузактагы бакчада сабалган бөбөктөрдүн ата-энеси менен жолукту.
Анда үч баланын ата-энеси укугун коргоп берүү арызы менен кайрылган. Алардын айтымында, тарбиячылар тарабынан ур-токмокко алынган (үчөөнүн тең денелери көгөрүп, тытылган) бөбөктөр 2, 3 жана 4 жашта.
“Акыркы күндөрү денеси көгөрүп, кулагынын арты тытылып келгенде тарбиячыларынан сурасам, “балдар менен уруша кетишти” деп койчу. Баламды тарбиячылары уруп жүргөнүн 29-ноябрь күнү билдик. Учурда балам башы, бели ооруп жатканын көрсөтүп, ыйлап, кусуп жатат”, — деди балдардын биринин апасы.
Ал эми экинчи эне 700 сомдон чогултулуп, бакчага камера орнотулганын, бирок ал иштетилбегендиктен бакчанын жетекчиси видеожазууну ата-энелерге көрсөтө албаганын билдирген.
Акыйкатчы тиешелүү маморгандарды балдардын коопсуздугун камсыздоону күчөтүүгө жана бул окуяны тыкыр иликтөөгө чакырды.