Ош шаарында төрт эмдүү болгон үй-бүлөгө президент Садыр Жапаровдун атынан 3 бөлмөлүү батир белекке берилди. Бул тууралуу шаардык мэрия кабарлады.
Маалыматка ылайык, батирдин ачкычын президенттин Ош облусундагы өкүлү Аманкан Кенжебаев жана Ош шаарынын мэри Жанарбек Акаев тапшырышты.
Белгиленгендей, жаңы батир жаш наристелер үчүн бардык шарттар менен камсыздалган. Мындан тышкары үй-бүлөгө балдар керебеттери жана коляскалар да берилди. Бул колдоо үй-бүлөнүн жашоо шартын жакшыртуу жана наристелердин келечегине кам көрүү максатында көрсөтүлгөн.
Иш-чаранын жүрүшүндө шаар мэри өлкө башчысынын атынан жаш үй-бүлөнү куттуктап, наристелерге бекем ден соолук жана узак өмүр каалады.
Өз кезегинде төрт эмдин ата-энеси көрсөтүлгөн колдоо үчүн президентке ыраазычылык билдиришти.
Белгилей кетсек, үстүбүздөгү жылдын 12-мартында Ош облустук бириккен клиникалык ооруканасында Араван районунун 26 жаштагы тургуну Дилшода Артыкова бир уул, үч кыз — төрт эмди жарык дүйнөгө алып келген.