Министрлер кабинетинин төрагасы Адылбек Касымалиев Вьетнамга жасаган расмий сапарынын алкагында Вьетнамдын премьер-министри Фам Минь Тинь менен жолугушту.
Адылбек Касымалиев Кыргызстан менен Вьетнамдын ортосундагы товар жүгүртүүнү өнүктүрүүдө позитивдүү динамиканы белгиледи. 2019-2024-жылдар аралыгында товар жүгүртүүнүн көлөмү дээрлик 13 эсеге көбөйгөн.
«Биздин өлкөлөр ортосундагы соода-экономикалык жана инвестициялык байланыштарга кошумча импульс берүү үчүн экономика чөйрөсүндөгү 3 фундаменталдык макулдашууну — бул Инвестицияларды колдоо жана коргоо, экономикалык кызматташтык жана кош салык салуудан качуу жаатындагы документти макулдашуу жана кол коюу маанилүү деп эсептейбиз», — деди ал.
Өз кезегинде Вьетнамдын премьер-министри Фам Минь Тинь кызматташтыкты өнүктүрүүгө багытталган демилгелерди колдоого даярдыгын билдирди.
«Эки тараптуу кызматташтыкты ар кандай тармактарда мындан ары өнүктүрүү боюнча биргелешип иштөөгө даяр экенибизди билдиребиз», — деди Вьетнамдын премьер-министри.
Тараптар транспорттук жана логистикалык байланыштарды кеңейтүү маселелерине өзгөчө көңүл бурушту.