8-март – Аялдардын эл аралык күнүнө карата Түркмөнстан бийлиги быйыл да 60 манат, болжол менен 3 доллар акчалай белек тапшырат.
Түркмөнстандын «Ватан» маалымат программасы кабарлагандай, акчалай белекти тапшыруу 1-мартта башталып, 6-мартка чейин уланат.
Белекти мамлекеттик жана жеке ишканаларда эмгектенген аялдар, пенсионерлер, социалдык жөлөкпул алуучулар, ошондой эле бардык билим берүү жайларында (бала бакчадан баштап докторантурада окугандарга чейин)окуган кыздар ала алышат.
Түркмөнстан президенти Сердар Бердымухамедов кол койгон документте бул каражат «өлкөнүн өнүгүшүнө жана гүлдөп-өсүүсүнө аялдардын кошкон салымын таануу» жана «энелер менен эже-карындаштарды урматтоо боюнча улуттук салтты улантуу» максатында берилери көрсөтүлгөн.
Учурда Түркмөнстанда 60 манатка бир нече килограмм пияз же бир килограмм эт сатып алса болот.