Эмгек, социалдык камсыздоо жана миграция министри Равшан Сабиров БУУнун 69-сессиясында Кыргызстандагы гендердик теңчилик жана аялдардын укуктарын кеңейтүү боюнча жетишкендиктерди билдирди.
Министрдин айтымында, Кыргызстан Туруктуу өнүгүү максаттарынын глобалдык рейтингинде 45-орунда. Өлкө өзгөчө гендердик теңчиликке басым жасап, аялдардын коомдук жана экономикалык турмушка активдүү катышуусуна шарт түзүүдө.
Кыргызстан – Эмгек уюмунун №190 Конвенциясын ратификациялаган биринчи мамлекет. Өлкөдө ишкерлердин 40% аялдар түзсө, алар үчүн атайын мамлекеттик колдоо программасы бар. Парламенттеги депутаттардын 22%, ал эми жергиликтүү кеңештердин 42% – аялдар. 2025-жылы кабыл алынган жаңы Эмгек кодекси аялдар үчүн кесиптик чектөөлөрдү алып салды.
Министр Кыргызстан аялдардын укугун коргоо боюнча реформаларды реалдуу ишке ашырып жатканын баса белгиледи.