Кыргызстанда жыл сайын жумуштан кеткен медицина кызматкерлеринин саны көбөйүп жатканы айтылды. Бул тууралуу саламаттык сактоо тармагындагы эмгек рыногун талдоо боюнча презентацияда маалым болду.
Эксперттердин маалыматына караганда, 2022-жылы саламаттык сактоо мекемелеринен 1,5 миңге жакын дарыгер кеткен. Анын ичинен 70и өлкөдөн тышкары жакка кеткен.
2023-жылы жумуштан кеткен дарыгерлердин саны 2,1 миңге жетсе, 2024-жылы бул көрсөткүч 2,4 миңден ашкан.
Акыркы үч жылда мамлекеттик ооруканалардан кеткен медайымдар, акушерлер жана фельдшерлердин саны да өсүүдө.
Буга чейин өлкөдө 6 миң 338 дарыгер жана 7 миң 880 орто медициналык кызматкер жетишпей турганы айтылган. Эң көп тартыштык үй-бүлөлүк дарыгерлерге, терапевттерге, педиатрларга, анестезиолог-реаниматологдорго жана акушер-гинекологдорго байкалууда.
Адистердин пикиринде, кадр тартыштыгынын негизги себептери — мамлекеттик ооруканалардагы айлыктын аздыгы жана жумуш жүгүнүн көптүгү.