Эммануэль Макрон учурдагы энергетикалык кризис Россияга каршы киргизилген санкциялар саясатын күмөн санатпоого тийиш экенин билдирди.
Франция президентинин айтымында, Жакынкы Чыгыштагы согуш мунай бааларынын өсүшүнө алып келип, дүйнөлүк камсыздоого коркунуч жаратууда. Ушуга байланыштуу Чоң жетилик (G7) өлкөлөрүнүн лидерлеринин жолугушуусунда стратегиялык мунай резервдеринен 400 миллион баррель мунай чыгаруу чечими кабыл алынган.
Макрон Франция бул жалпы аракетке кошуларын, бирок мунай резервдери баскыч-баскыч менен пайдаланыларын айтты. Анын маалыматына ылайык, Франциянын стратегиялык запастары 14,5 миллион баррелге чейин мунай берүүгө мүмкүнчүлүк түзөт.
Президент ошондой эле мунай бааларынын кескин өсүшү же Ормуз кысыгы аймагындагы чыңалуу Россияга каршы санкцияларды алып салууга негиз боло албай турганын баса белгиледи.
Макрон мындан тышкары Ирандын мүмкүнчүлүктөрүн да баалабай коюуга болбой турганын эскертти. Анын айтымында, өлкөнүн аскердик баллистикалык потенциалына олуттуу зыян келтирилгени менен, Иран дагы эле аймактагы бир катар мамлекеттерге сокку урууну улантууда.
Франция президенти ошондой эле Дональд Трампты аймактагы аскердик операциялардын кийинки баскычын аныктоого чакырып, АКШ өзүнүн максаттарын жана операциялардын ыргагын так түшүндүрүп бериши керек экенин белгиледи.
Макрондун айтымында, дүйнөлүк рыноктор үчүн эң чоң кооптонуу жараткан аймак — бул Ормуз кысыгы. Ал жерде кырдаал азырынча өтө кооптуу бойдон калууда жана бул аймак «аскердик аракеттер жүрүп жаткан зонага» айланган.
Мунайдан тышкары, кырдаал жер семирткичтер рыногуна да таасирин тийгизип, эл аралык жеткирүүлөрдө чыңалуу пайда болду. Бул өз кезегинде фермерлерге жана азык-түлүк өндүрүшүнө түздөн-түз таасир этиши мүмкүн.
Акырында Макрон мүмкүн болушунча тез арада согуштук аракеттерди токтотууга чакырып, конфликттин узакка созулушу дүйнөлүк экономикага жана коопсуздукка дагы чоң зыян алып келиши мүмкүн экенин белгиледи.