Бүгүн Президенттин Администрациясынын «Ынтымак Ордо» имаратында юбилейлик Ысык-Көл эл аралык форумун даярдоо жана өткөрүү боюнча уюштуруу комитетинин жыйыны өттү. Жыйынга Министрлер Кабинетинин төрагасынын орун басары Эдил Байсалов төрагалык кылды.
Жыйында форумдун тарыхый мааниси белгиленип, 1986-жылы Чыңгыз Айтматовдун демилгеси менен башталган бул иш-чара жазуучулар, окумуштуулар жана коомдук ишмерлер үчүн маанилүү интеллектуалдык аянтчага айланганын баса белгилешти.
Эдил Байсалов форумдун учурдагы глобалдык чакырыктар шартында өзгөчө мааниге ээ экенин белгилеп:«Талкуунун борборунда климаттын өзгөрүшү, жасалма интеллект жана глобалдык Түндүк менен Түштүктүн өз ара аракеттенүүсү турушу керек», – деди.
Маданият, маалымат жана жаштар саясаты министри Мирбек Мамбеталиев уюштуруу планы тууралуу маалымат берди. Комитет мүчөлөрү форумду жогорку деңгээлде өткөрүү боюнча сунуштарын айтышты.
Юбилейлик форум 2026-жылы өтүп, Кыргызстандын ШКУдагы төрагалыгынын алкагындагы негизги маданий-гуманитардык окуялардын бири болоору каралып жатат.
