Экономика жана коммерция министринин биринчи орун басары Чоро Сейитов Эл аралык валюта фонду миссиясынын башчысы Николоз Гигинеишвили жана фонддун өлкөдөгү туруктуу өкүлү Фарид Талышлы менен жолукту.
Маалыматка ылайык, жолугушуу макроэкономикалык кырдаалды баалоого багытталган IV берене боюнча консультациялардын алкагында өттү.
Анын башкы максаты учурдагы экономикалык процесстерди талкуулоо, Кыргызстандын социалдык-экономикалык өнүгүүсүн талдоо жана туруктуу экономикалык өсүштү камсыз кылуу боюнча сунуштарды иштеп чыгуу болгону айтылды.
Жолугушууда фискалдык-бюджеттик саясат, инвестициялык климат, энергетикалык сектордогу реформалар жана коррупцияга каршы чаралар боюнча маселелерге басым жасалган.