Жарандык, улуттук иденттүүлүк маселеси ар дайым кыйчалыш кезде курч коюлат, тагдыр чечкен учурда калдайып чыгат. Бул тууралуу Мамлекеттик катчы Сүйүнбек Касмамбетов «Кыргыз жараны» улуттук иденттүүлүк концепциясын ишке ашыруунун актуалдуу маселелерине арналган кереге кеңеште билдирди.
“Кыргыз Туусу” гезити 14-мартта өткөргөн кеңешмеге окумуштуулар, адистер, мамлекеттик бийлик органдарынын өкүлдөрү катышып, кеңири пикир алышты.
Мамлекеттик катчы Кыргыз Республикасынын президенти Садыр Жапаров жарандык иденттүүлүктү калыптандырууга өзгөчө көңүл бөлүп, бир катар жарлыктарды чыгарганын жана концептуалдуу документтерди бекиткенин маалымдап, акылгөй коомчулук кыргыз жаранын калыптандыруунун факторлорун жана проблемаларын аныктоого тике аралашып, ой-сунуштарын берип туруулары зарыл экендигин белгиледи.
Сүйүнбек Касмамбетов өлкөнүн өнүгүшүнө багытталган изги сунуштарды талкуулаган, жаратман идеяларды кеп кылган ушундай кереге кеңештерди ар кыл темада жана түрдүү форматта дайыма өткөрүп туруу зарылдыгын белгиледи.