Француз окумуштуулары өлкөнүн Мозель регионунан капысынан 46 млн. тонна жаратылыш суутегин табышты.
Метан издөө убагында изилдөөчүлөр 1250 метр тереңдиктен ак суутекти көрүшкөн. “Жашыл, “боз” суутекке салыштырмалуу бул энергия булагы өндүрүштүк иштетүүнү талап кылбайт. Ак суутекти натыйжалуу өндүрүү колго алынса ал биринчиден, кымбат болбойт, экинчиден, экологиялык жактан таза болот. Изилдөөгө катышкан доктор Жак Пирондун белгилешинче, жаратылыш суутеги болжолдонуп жаткан көлөмдөн алда канча көп болушу мүмкүн. Эгер аны колдоно баштаса, дүйнөдө энергетикалык стратегия түп тамырынан өзгөрүшү да ыктымал дешет аны тапкандар.