Бишкек шаарындагы 3 гектар жер курулуштары менен бирге мамлекетке кайтарылды. Бул тууралуу УКМК билдирди.
Маалыматта айтылгандай, борбор калаанын жергиликтүү өз алдынча башкаруу органдары мамлекеттин үлүшү бар «А.Ж.» ишканасына автотранспорт ишканасын түзүү жана автоунаа токтотуу жай курууга багытталган 5,5 гектар жер тилкесин өткөрүп беришкен. Аталган ишкананын акционерлердин бири мамлекеттик мүлктү башкаруу органында иштеген.
Андан кийин менчиктештирүү мезгилинде мамлекеттик мүлктү башкаруу органында иштеген кызматкерге таандык акциялардын үлүшүн ишкананын башка акционерлери жол-жобну бузуу менен төмөндөтүлгөн баада сатып алышкан. Ошол эле учурда бөлүнгөн жер тилкеси аталган ишкананын менчигинде толук бойдон калган.
Көрүлгөн чаралардын натыйжасында жогоруда аталган объектинин ээси А.А.К. акционерлер менен биргеликте аянты 5,5 гектар жер тилкесин бөлүштүрүү чечимин кабыл алышкан. Ошондой эле 3 га жер тилкесин бардык курулуштары менен мамлекеттин балансына кайтарып беришкен.