Жогорку Кеңештин бүгүн, 10-апрелдеги жалпы жыйынында депутат Ырысбек Атажанов вице-мэр Рамиз Алиевге жолдордо жана коомдук жайларда турган кайырчылар менен күрөшүүнү тапшырды.
Депутаттын айтымында, Өзбекстандан келген кайырчыларды депортациялоо керек.
Парламентарий учурда шаарда селсаяктар көп экенин белгилеп, алар үчүн реабилитациялык борборлор барбы деп сурады.
«Шаардык мэрияда мындай реабилитациялык борборлор жок. Бирок биз селсаяктар менен күрөштү Ош базарынан баштадык. Азыр Токтогул, Бейшеналиев, Фучик көчөлөрүндө жок. Ал жерде спирт ичимдиктерин ичүү үчүн атайын жайлар бар болчу», — деп жооп берди вице-мэр.
Депутат Ырысбек Атажанов Ош базарынан селсаяктар башка жакка кетип жатканын белгилеп, алар үчүн реабилитациялык борборлорду түзүү зарыл деген оюн билдирди.