Бишкекте 100 гектарга түшчү бак питомнигинин беш гектарына көчөттөр тигилди. Мэриянын маалыматына ылайык, Кытайдын Циндао шаарынан келген инвесторлордун колдоосу менен курулуучу питомнигин калаа башчысы Айбек Жунушалиев текшерди.
Эксперименттин алкагында, бир айдын ичинде 12,300 бактын көчөтү жана 9,000 түп бадал отургузулду. Отургузулган көчөттөрдүн арасында зараң, кытай акациясы, жөкө дарак, бегония, теректин үч түрү жана башка өсүмдүктөр бар.
Айбек Жунушалиев «Бишкек жашыл чарба» ишканасын кытайлык адистер менен тыгыз кызматташууга чакырып, жашылдандыруу процессин жакшыртуу жана экологиялык туруктуулукту камсыз кылуу боюнча пландарын бөлүштү.
Бул долбоор Бишкектин экологиясын жакшыртууга, жашыл аймактарды көбөйтүүгө жана шаардыктар үчүн жагымдуу жашоо шарттарын түзүүгө багытталганы, аталган демилге шаардын экологиялык балансын сактоодо маанилүү кадам экени айтылат.