Бүгүн, 28-апрелде өлкө башчы Катардын Улуттук олимпиада комитетинин президенти шейх Жоан бин Хамад Аль Танини кабыл алды. Бул тууралуу президенттин маалымат кызматы билдирди.
Жолугушууда спорт тармагындагы кыргыз-катар кызматташтыгын өнүктүрүүнүн актуалдуу маселелери, анын ичинде спорттук инфраструктураны чыңдоо маселелери талкууланды.
Садыр Жапаров Кыргызстанда олимпиадалык бассейн, бокс академиясы жана Улуттук олимпиада комитетинин жаңы имараты сыяктуу заманбап спорттук объектилерди куруу үчүн Катардын тажрыйбасын жана инвестицияларды тартуу мүмкүнчүлүгүн карап чыгууну сунуштады.
Ал эми Жоан бин Хамад Аль Тани эки өлкөнүн спорттук байланыштарын чыңдоого багытталган сунуштарды кароого даяр экенин билдирди. Ошондой эле ал Кыргызстанда мектептерде сууда сүзүүнү өнүктүрүү боюнча долбоорду ишке ашырууну сунуштады.