2025-жылдын 1-майына карата өлкө боюнча пенсия алуучулардын жалпы саны 807 миң 800 адамды түзүп, өткөн жылга салыштырмалуу 28,5 миң адамга көбөйдү. Бул тууралуу Министрлер кабинетинин 4 айлык ишинин жыйынтыгы боюнча өткөн кеңешмеде маалымдалды.
Январь–апрель айларында пенсияларды төлөөгө 34,4 млрд сом каражат багытталган. Бул өткөн жылдын ушул мезгилине салыштырмалуу 5,6 млрд сомго көп.
Ошондой эле, быйыл 1-майга карата мамлекеттик жөлөкпул алуучулардын саны 308,3 миң адамды түздү. Аталган жөлөкпулдарды төлөөгө бюджеттен жалпысынан 4,5 млрд сом бөлүнгөн.
Анын ичинен:
– “Үй-бүлөгө көмөк” жөлөкпулуна – 1,1 млрд сом,
– Социалдык жөлөкпулга – 2,9 млрд сом,
– “Балага сүйүнчү” жөлөкпулуна – 179 млн сом каралган.
Өкмөт социалдык төлөмдөргө каражатты өз учурунда бөлүп берип жатканын жана жөлөкпул менен пенсия алуучулар боюнча маалыматты көзөмөлдөп турарын белгиледи.