Жогорку Кеңеште президент, министрлер кабинетинин төрагасы кызматына, Жогорку Кеңештин депутаттыгына мурда соттолгон же кийин соттуулугу жоюлган, кылмыш иштери кыскартылып кеткен талапкерлердин катышуусуна тыюу салган мыйзам долбоору биринчи окууда кабыл алынды.
Депутат Эльвира Сурабалдиева бул мыйзам соттуулугу жоюлган жарандарга саясий кызматтарга келүү, депутат болуп шайлануу укугун чектеши мүмкүн экенин айтты.
«Азыр сиздер сунуштап жаткан долбоор, кокусунан мушташып, урушуп иш козголуп калса, бирок тараптар өз ара келишип алып иш кыскарса деле депутат боло албай калат экен. Биз андай адамдардын укугун чектеген жокпузбу? Эмдиги жылы шайлоо болот, азыртадан эле өзүңөргө ыңгайлуу талапкерлерди элеп жатасыңар деген сөздөр айтыла да баштады. Бизде сот системасы кынтыксыз эмес. Сот чечимине нааразы болгондор көп»,
-деди
Ал эми УКМКнын өкүлү Сагынбек Самидин уулу мыйзам сотто толук акталгандарга тиешелүү эмес экенин белгиледи.