Министрлер Кабинетинин төрагасынын орун басары Эдиль Байсалов Шанхай эл аралык кинофестивалында «Кара Кызыл Сары» тасмасы менен жеңишке жетишкен Кыргыз Республикасынын эл артисти, кинорежиссер Актан Арым Кубатты кабыл алды.
Эдиль Байсалов республика жетекчилигинин атынан Актан Арым Кубатты эл аралык сыйлыгы менен куттуктап, кыргыз кино өнөрүнүн өнүгүшүнө жана Кыргызстандын маданий аброюн дүйнөдө таанытууга кошкон салымы үчүн ыраазычылык билдирди. Ал бул жеңиш жалпы өлкө үчүн маанилүү окуя экенин баса белгиледи.
«Кыргызфильм» киностудиясында жазуучу Топчугул Шайдуллаеванын новеллаларынын негизинде тартылган «Кара Кызыл Сары» тасмасы 27-Шанхай эл аралык кинофестивалында “Эң мыкты толук метраждуу тасма” номинациясында башкы сыйлыкка — “Алтын Гоблет” (Golden Goblet Award) ээ болду.
Тасма Баткен облусунун келечекке үмүт арткан келинин тагдырын поэтикалык жана терең формада баяндайт. Анда сүйүү, жоопкерчилик, миграция жана чек арадагы жашоо сыяктуу маанилүү темалар козголот.
Жолугушуунун жүрүшүндө Эдиль Байсалов менен Актан Арым Кубат өлкөдө кинематография тармагын өнүктүрүү маселелери боюнча пикир алмашышты.