Бизге эксклюзив жеткен маалыматтарга ылайык, жакында Кыргызстанда “Дарыгерлер” сериалы тартыла баштайт.
Биздин булактын маалыматы боюнча сценарий бекитилип, актерлор тандалып алынды. “Өңгөлөргө жарык чачып, өзүм күйүп баратам” – дарыгерлердин эмгегине байланыштуу айтылган ушул саптар болочок фильмге эпиграф кылса жарашчудай.
Чыгармага эпиграф болбосо да, ар бир медицина кызматкерине ода катары айтса ашыктык кылбайт. Медицина кызматкерлеринин бийик, оор жана ардактуу миссиясына арналган, ошол тармактын каармандарынын тагдырын чагылдырган бул көркөм сериалга 21-июлда старт берилмекчи. Сериалдын режиссеру жана сценарийдин автору – белгилүү режиссер Ырыс Окенова, башкы продюсери — Барно Усманова. Фильм мамлекет тарабынан каржыланат. Фильмдеги сюжеттер ар кайсы аймактарда, негизинен Оштогу ооруканаларда тартылат.
Жалпы улуттук “Кыргыз Туусу” гезити сериалдын тартылышынан анын режиссерунун уруксаты менен маал-маалы менен маалымдап турмакчы.