Орусиянын Мамлекеттик Думасынын Алексей Нечаев жетектеген «Жаңы адамдар» фракциясынын депутаттары билим берүү министри Сергей Кравцовго мигранттардын балдарынын мектепте бекер билим алуусун чектөө сунушу менен кат жолдошту. Бул тууралуу ТАСС агенттиги жазды.
Кайрылууда парламентарийлер Орусиянын жарандыгы жок балдар мамлекеттик жана муниципалдык окуу жайларда акы төлөп гана окуй турган норманы бекитүүнү сунушташууда.
Демилге авторлорунун айтымында, чет элдиктердин балдарын бекер окутуу бюджетке жана билим берүү инфраструктурасына оорчулукту күчөтөт. Мындан тышкары, депутаттар бир катар аймактарда мектептердин ашыкча жүктөлүшүн, окуу орундарынын жетишсиздигин жана орус тилин начар билген окуучулардын окуу көрсөткүчтөрү төмөн экенин белгилешти.
«Чет элдик жарандар балдарынын окуу акысын орусиялык салык төлөөчүлөргө жүктөбөстөн өздөрү төлөшү керек»,
— деп айтылат катта.